مقرونة الوردة المحشية بالدجاج

مقرونة الوردة المحشية بالدجاج
الصوص :
تصمت 3طمطومات وترحيهم وبعد تقلي مغرفة ماكلة طماطم  معجونة في الزيت وتزيد الثوم والتابل مفوح وتصب عليها الطماطم المرحية ووريقة رند وفلفل اكحل وملح وفلفل مرحي وزعتر وكركم وتغليها لين تطيب وبعد صب الصوص في طبق الفرن .
حشو المقرونة:
تقلي البصل والسكالوب مقطع جويد أو مرحي
وتزيدو المعدنوس والكركم والفلفل الاكحل والتابل والملح وعضمة مصموتة وجبن  وتخلط الكل وتغطس وردات المقرونة في ماء يغلي وتخليها 3 دق وبعد تحشي المقرونة وترصفها في طبق الفرن في الصوص وتبعدهم على بعضهم

الباشامال
25 غ زبدة
و2مغارف فرينة
تحركهم بالباهي على الغاز
وتمرقهم بكاس حليب وتحرك وتزيد ملح وشوية جوز الطيب وحركها حتي تطيب كان جات يابسة زيد الحليب المهم تكون جارية وماتنساش حط فيها الجبن
حط الباشامال  على الكعاب المحشين واخيرا رشة جبن
في الترصيف بعدي الكعاب على بعضهم

هريسة دياري

تاخو الفلفل وتنحيلو النقود متاعو واغسلو بالباهي وبعد فورو وثقلو بحاجة رزينة باش يسقطر وخليه ليلة كاملة في الثلاجة باش يتنحى منو الماء الكل ، وبعد ارحيه ونحيلو الزريعة وفوحو بالملح والكروية والثوم إلى تكون صمطو حسب الوزن حط فيه دواء التصبير أو حطو في الكونجيلات واستعمل بالدبوسة بالدبوسة

سباقتي بغلال البحر

حط في المقلة
راس بصل مفروم وزيت و3 كعبات طماطم مقطعين وتحركهم شوية وبعد تحط المول يكون منظف وتحرك شوية وتخليه يشكشك توا تتحل كعاب المول بالكعبة بالكعبة حتى يتحلو الكل زيدهم مغرفة كبيرة طماطم معجونة وراس ثوم مفروم وشوية هروس باش نفلفلوها والقرنيط والشوباي مصموتين شوية وامرق وزيد ملح وفلفل اكحل وكركم وشوية فلفل مرحي وخليها تغلي وكيف قريب تطيب زيد الكروفات وخليها لين تقر زيتها قطع وريقات حبق وبين صوابعك كمون واطفي وغطيها
اصمت المقرونة عادي وبعد نحي المول والقرنيط والكروفات وحدهم وخلط المقرونة بالصوص وزين بالباقي

 

كسكسي بالبسباس العربي واليازول

قطع البسباس واليازول وتحطهم يفورو  وفوقهم الكسكسي
الصوص : تقلي بصل وطماطم معجونة وطماطم شريحة وهريسة عربي و هريسة حانوت  وبعد تمرق وتزيد راس ثوم مهرس وكروية وملح وكركم مغرفة مليان فلفل مرحي وفلفل ملاحي وفلفل بر العبيد
وكيف يطيب الكسكسي ويكون خلطتو مع البسباس واليازول وعاودت فورتو سقيه بالمرق
واقلي أو اشوي الحوت الموجود عندك

مرقة قرنيط

تصمت القرنيط شوية باش يتنحى منو الماء الأحمر والكشاكش متاعو وبعد أغسلو وحطو في طنجرة وزيدها بصل وجلبانة وزيت وقليها مع كعبة طماطم خضراء وزيد مغرفة طماطم معجونة وامرق وفوح بالملح والكركم وفلفل اكحل وبسباس مرحي وفلفل مرحي وخليها تغلي لين يطيب القرنيط وتقر زيتها

بالنسبة للبطاطا أصمتها وحدها مع كعيبة ملح وكركم وكيف تحط في الصحنات زين بالبطاطا وبقرين فلفل مقلي

البطاطا في المرقة كيف ترميها من الاول تمصتها

كيكة الدرع

كلّ المكونات تضعها مع بعض وتركّض بالباهي لين تولّي كريمة وتكيّل بكعبة الياغرت  فارغة

ثلاث بيضات ، من 2 إلى 3 ياغرتات سكر حسب الحاجة ، كعبة ياغرت طبيعي ، مغرفة صغيرة جيلك ، 2 فانيليا ،حكة زبدة ذائبة ، نصف حكة عطرشاء ، باكو كريمة فانيليا    ، أربع حكك درع مرحي ومغربل ، وباكو خميرة قاتو

كيف تنتهي من التركيض صب كأس جلجلان مقلي وزيد خلطها

ادهن القالب بالزبدة والفرينة وصب الخليط ورش الفاكية إلي عندك وكان تحب قص دقلة جويدة ولفها في الفرينة ورشها زادة

طيبها في الفرن على 180 درجة

اسكالوب محشي

تقلي بصلة في الزيت وتمرقها بالماء وتزيدهانصف مغرفة طماطم وكركم وملح وفلفل اكحل وزنجبيل وجلبانة وتابل مفوحوتخليها تغلي لين تطيب الجلبانة حطو في طبق الفرن
تاخو سكالوب وتقصو في شكل مربعات متقايسة والباقي تقطعو جويد باش تعمل بيه الحشو
تفوح الاسكالوب بالملح وزيت وفلفل اكحل وتابل مفوح وزنجبيل واكليل وزعتر وكروية وتخليه يبنان شوية وبعد سوتيه في المقلة وخرجو على جنب
وفي نفس المقلة تقطع بصلة وزيدها اطراف الدجاج الجويد وتقليه وتفوحو وبعد زيدو شوية معدنوس واصفر البيض وجبن
تحط المربعات وفوقهم خليطالدجاج واخيرا جبن وتحطهم في صوص الجلبانة الطايبة وطيبو في الفرن
اقلي بطاطا وزين صحناتك وتاكلو بالشفاء

خبزة ياغورت

تحط في العجانة المكونات هذه بكلها :
4 بيضات / 160 غ سكر/ ١ فانيليا /300غ فرينة مغربلة /ياغرتة /نصف ياغرتة حليب/ 60غ زيت نباتي /مغرفة ص جيلك /مغرفة ص نشاء/1خميرة
وبعد حط الخليط في مول ورش الفاكية مهروشة وطيبها على180°

بسبوسة باللوز والبوفريوة

البسبوسة الشهيرة باللوز والبوفريوة
كاس سميد ارطب وكاس ونصف سميد متوسط وكاس صب فيه كعبة جوكاي وكمل عبيه بالحليب وكاس سكر ونصف كاس عطرشاء وقطرات روح اللوز و150 غ لوز وبوفريوة مقلين ومرحين بالباهي ومغرفة ماء ورد و1 فانيليا و1خميرة و3مغارف زبدة وعضمة
تخلط الكل بالباهي في الخلاط وبعد حطهم في طبق الفرن وغطيهم بورق اللف وخليهم يرتاحو ساعتين اقل حاجة
وبعد رشق معبات لوز وحطها تطيب على نار هادية
اعمل الشحور :
2 كيسان سكر عليهم 4 كيسان ماء
وعصير نصف قارصة وحطهم يغليو 15 دق
خرج الطبق متاع البسبوسة من الفرن وشقو وبعد رجع جمرو من فوق
ذوب 50 غ زبدة حتى تطلع ريحتها وصبها على العسل الطايب
وخرجو آخر مرة وصب عليه الشحور
باش تلقى برشا عسل من فوق ماتخافش تشربو الكل
غطيها وخليها تتشرب على الاقل 5 ساعات
واخيرا قصها باردة