هريسة حمراء

ترحي الفلفل الاحمر نيء بعدما تنحيلو الزريعة متاعو وترحي الطماطم والثوم نيين زادة وبعد تزيدهم شوية زيت وتطيبهم حتى يذبالو فوح بالملح والكروية  فما شكون يحب طعم الثوم نيء ينجم يزيد سنة ثوم نيئة مرحية بعدما تطيب وبعد حط في الصحنات وزيدهم قطيرة زيت جديد وتاكلو بالشفاء

كيكة عائلية لفطور الصباح

تأخو 5 بيضات بحرارة الغرفة وتزيدهم كأس ونصف سكر و 1 فانيليا

تخلط في صحفة كأس إلا ربع زيت او زبدة ومعاه 2 ياغورت طبيعي

تغربل 2 كيسان ونصف فرينة ومعاهم 1 خميرة قاتو

نبدأ في العمل الآن : تركض البيض بالباهي لين تتحصلي على خليط كريمي وبعد تزيدو خليط الزيت والياغورت وتكون الركاضة باقي تركض ولكن بسرعة أقل وأخيرا زيد الفرينة شيء فشيئا تتحصل على الخليط جاهز صبو في الطبق وخلي شوية زيدها مغرفة كاكاو وخلطها وصبها متفرقة للزينة وأخيرا رش كعيبان الشكلاطة ودخلها للفرن على 180 د

قصها برفق وتكون باردة باش ما تتفتفتش

مقرونة باللانقوستين

حط في المقلة
راس بصل مفروم وزيت و3 كعبات طماطم مقطعين وتحركهم شوية وبعد  زيدهم مغرفة كبيرة طماطم معجونة وراس ثوم مفروم وشوية هروس باش نفلفلوها وشوية طماطم شريحة وامرق وبعد ارمي اللانقوستين وزيد ملح وفلفل اكحل وكركم وشوية فلفل مرحي وخليها تغلي وكيف قريب تطيب زيد رشة نعناع شايح  وخليها لين تقر زيتها  اطفي وغطيها
اصمت المقرونة عادي وبعد نحي اللانقوستين  وحدها وخلط المقرونة بالصوص

مرقة ببوش

نظف الببوش وتحطو فوق المرمرة يستقطر وبعد خوذ معجنة وكب فيها صحن وحط الببوش ورش عليه كسكسي قمح أو شمسي وغطيه بالغربال باش يكون مهوي وما يموتش وكل نهاراغسلو وسقطرو و رش عليه الكسكسي وتخليه 3 أيام يأكل الكسكسي اليوم الاخيرتغسلوبالباهي وتسقطرو وترش عليه شوية جبن تغسلو وتخليه يسري والكعبة الحية تحطها في الطنجرة وتصب عليهم الماء وبعد حطها على الغاز وكبّـر عليه دوبما يغلي ويخرج الكشكوشة متاعو نهبطو ونغسلو برشا مرات ونصبلو ماء آخر نظيف ونفوحو بالثوم والاكليل والكركم والنعناع الأخضر والملح والفلفل الاكحل ونخليه يغلي لين يطيب نعاود نغسلو نسقطرو بالباهي

الصوص : نقلي بصل و 2 طمطومات وطماطم معجونة وهريسة عربي أو فلفل احمر مرحي وطماطم شريحة ونعناع واكليل وفلفل أكحل وكركم وملح وفلفل مرحي وبرشا ثوم وكروية نمرق ونرمي الببوش وكيف يغلي نرمي الفول الاخضر والبطاطا وفلفل اخضر وفلفل شايح وخليه يغلي على نار هادية حط في الصحنات

 

طاجين الطبقات بالجوزة

الطبقة الاولى :  العجينة : 300 غ فرينة ونصف باكو خميرة وعضمة و 150 غ زبدة وملح وتعجنها بالحليب و تنقبها بالفرشيطة، وبعد حضر خليط الدجاج

تطيب الدجاج بالبصل وتفوح بالزيت وملح وفلفل اكحل وكركم واكليل وزنجبيل مرحي وشوية زعتر وتابل مفوح وتخليه لين يشيح من الماء متاعو ويبرد زيدو أصفر بيض وجبن و2 بيضات مسلوقين وبالنسبة لكمية البيض تزيد بالشوية بالشوية حتى تتحضل على خليط كريمي وترحي الكل في الخلاط  وتصبو على طبقة العجين وتحطو في الفرن وشعل عليه الفور من فوق باش تشد روحها الطبقة العليا

تأخو 300غ قوتا ومعاها أبيض بيض وجبن وملح وفلفل أكحل وشوية زوج الطيب وترحيه بالمكسور وكيف تحس الطبقة الاولى شدت روحها تصب الخليط متاعك برفق وتشعل الفرن من الأسفل

ارحي 200 غ جوزة وكيف يطيب الطاجين ويشد روحه رش عليه الجوزة المرحية وخليه يبرد وبعد قصو كيما تحب

 

تالياتلي بالشوفرات

تالياتلي بالشوفرات
تصمت 8 كعبات طماطم خضراء وبعد سقطرهم وارحيهم
وقلي بصلة صغيرة في الزيت وزيدها الطماطم المرحية وفوح بالثوم وشوية تابل زيدها الملح والفلفل الاكحل والكركم  وخليها تشكشك وبعد زيدها الشوفرات وخليها تغلي  حتى تخثار وتطيب
اصمت التالياتلي وزين الصحنات

كسكسي بالقرنيط

اصمط القرنيط 11 دق  في الماء باش ينحي الحمورية و تسقطرو و بعد تقلي بصلة و ترمي القرنيط و الطماطم و تقلي شوية و بعد تزيد 1/2 مغرفة صغيرة هريسة عربي و 3 سنون ثوم و و تفوح عادي بالفلفل اكحل و فلفل احمر و كركم و شوية تابل  و تمرق بالماء و في نصف الطياب ترمي الخضرة اللي تحبها قرع و جزر و وتصمت الحمص  وحدو في الماء  و عندما يطيب المكونات الكل تكون فورت الكسكسي فوق المرق تمرقو و تقدمو مع القرنيط و الخضرة

قلاية علوش بالطماطم

تقطع اللحم جويد وتحطو يغلي في الماء والزيت ومغرفة كركم حتى قريب يطيب زيدو مغرفة قهوة صغيرة طماطم معجونة وفلفل أكحل وكروية وكعيبة بطاطا وخليها تطيب لين تخثار وتقر زيتها فقر عضيمة كان تحب وسربي في الصحنات  ممكن البطاطا ترميها تطيب في المرق أو تقليها مع قرين فلفل وماتنساش رشة معدنوس